القس أشرف بشاى
بمناسبة البيان الغريب اللي كتبه بعض من مشاهير الأقباط ليتباكوا فيه على التهديد الإسرائيلي لتعدُّديّة مدينة القدس:
١. كنت أحبّ أسمع صوتك أمام حملات التهجير والتفجير والتمييز الممنهج الذي يتم برعاية سلطات الدولة المصرية ضد الأقباط!
مصر راح منها "كوهين" في الوبأ في زمن عبد الناصر، والنهاردة بيروح منها "مرقس"، عشان يخلى الجو لحسن يعيش فيها وحده.
صدّقني كنت أحب أسمع صوتك!!
٢. لو صدرت ليكم الأوامر بممارسة لعبة "بص العصفورة" عشان تشغلونا شويّة عن واقعنا المزري بكتاباتكم عن إسرائيل، فإحنا عارفين المصيبة اللي احنا فيها ومحدش غبي عشان ينخدع في اللعبة الساذجة دي
٣. لو اِنت متعلّم، فإسرائيل فيها الجامعة رقم ١٢ على مستوى العالم، وشوية جامعات اتصنفّت ضمن أحسن ٥٠٠ جامعة. الهم والباقي عليك اِنت معندكش ولا جامعة عربية في التصنيف. شويّة الجامعات اللي عندك مستواهم ميجيش مستوى مدارس ابتدائية في إسرائيل ... خسارة العمر اللي ضاع في تعلّم اللاشيء في بلادنا.
فيه كمان في اسرائيل عشرات خدوا جائزة نوبل في الفيزياء والكيميا والطب والفلك وغيرها من العلوم. اِنت كعربي معندكش غير أربعة أشخاص خدوها، اتنين من الأربعة كانوا عايشين برّة مستنقع الشرق الأوسط.
٣. لو اِنت انسان، فإسرائيل اخترعت لك حاجات تفيد البشرية ملهاش اول من آخر، كل فاكسين بياخده طفل عربي يحميه من شلل الأطفال احنا مديونين بيه لشخص يهودي إسرائيلي. فضل علماء اسرائيل على اليهودية ملهوش نهاية .. اِنت بقى بتصدر للعالم ايه غير فكر الارهاب والتفجيرات والدهس بالشاحنات، واللاجئين والمهاجرين غير الشرعيين؟!
اسرائيل عايش فيها عشرات الآلاف من المصريين (المسلمين) في عز وهنا وفرص تعليم وعمل ومحدش منهم اشتكى (رغم انها مش بلدهم أساساً) ... كل انسان بياخد حقه وزيادة مدام قايم بواجباته ... ثق ان محدش مستهدفك عشان تسيب مصايبك والمجاري اللي طافحة في شوارعك، وتمسك في دولة حافظت على معاهدة السلام معاك حتى في وقت سيولة الدولة المصرية ايام الثورة، لما اخواتك العرب دخلوا يخرّبوا ويفتحوا السجون ويقتلوا الناس!
٤. لو اِنت مسيحي، فأنت ٧٩٪ من كتابك المقدَّس هوّه كتاب اليهود، فبلاش حد يجرجرك في صراع ديني (إسلامي-يهودي) اِنت ملكش فيه ولا ناقة ولا جمل. المسيحيّين مش في عداء مع اليهود، ولا في عداء مع اي حد تاني. اِنت محتاج بس تشوف الكوارث اللي اِنت عايش فيها: الفقر والجوع، تدني التعليم، انهيار منظومة الصحة، الفساد الطافح، القوانين والتشريعات المهلهلة، انقسام المجتمع: سني وشيعي، مسيحي ومسلم، بدوي ونوبي، انقطاع الميّة والكهرباء، وطفح المجاري، .... الخ الخ الخ من البلاوي الزرقا المتلتلة ... اِنت -لو تدري- في همّ ما يتلّم ..
انسَ اسرائيل
انس نظرية المؤامرة
خليك في نفسك
بص في ورقتك وجاوب يا شاطر
ياللا فرصة للي بيفهموا يقولوا القسيس اشرف ساب المسيح وبَقى يهودي!